სამკურნალო დიეტა ახდენს ორგანიზმის ნერვული სისტემის ფუნქციონირების, ნივთიერებათა ცვლის პროცესების და სისხლის შედედების უნარის ნორმალიზებას, აგრეთვე, აუმჯობესებს სისხლძარღვთა კედლის გამავლობას.

ეს მიიღწევა, ერთის მხრივ, რაციონის კალორიულობის შეზღუდვით, ანუ ცხოველური ცხიმების და ნახშირწყლების დღიური დოზის შემცირებით, ხოლო, მეორე მხრივ, კვების რაციონის ლიპოტროპული ნივთიერებებით (ქოლინი, მეთიონინი) მცენარეული ცხიმებით, უჯრედისით, ზღვის პროდუქტებით, C, P და B ჯგუფის ვიტამინებით, კალიუმის და მაგნიუმის მარილებით გამდიდრების ხარჯზე.

საკვების განაწილება დღის განავლობაში თანაბარი უნდა იყოს (არანაკლებ 4-5 ჯერ დღეში). დღის ბოლოს მიღებული საკვების რაოდენობა უნდა იყოს უფრო მცირე, ვიდრე დღის პირველ ნახევარში. საკვები უნდა მიიღოთ, არაუგვინეს 2 საათით ადრე, დაძინებამდე.საკვები მზადდება მარილის დამატების გარეშე. ექიმთან შეთანხმებით, ნებადართულია დღეში მხოლოდ 4-5 გ. (1 ჩ.კ.) მარილის გამოყენება. პროდუქტები იხარშება, ან მზადდება ჰაერღუმელში ცხიმის გარეშე. დღის განმავლობაში მისაღები სითხის რაოდენობა შეადგენს 1 - 1,5 ლ. დღეში

ზემოაღნიშნული მოთხოვნების შესაბამისად, ათეროსკლეროზით დაავადებულთათვის ნებადართულია შემდეგი პროდუქტების მიღება:

პურ-ფუნთუშეული
რეკომენდებულია ჭვავის პური, უხეშად დაფქვილი ფქვილით გამომცხვარი პური, ხორბლის მარცვლის კვერები , უცხიმო " პეჩენია ". ჭარბი წონის მქონე პირებმა უნდა შეამცირონ ცომეულის მიღება.

წვნიანი კერძები
მიირთვით ძირითადად ვეგეტარიანული, ბოსტნეულის (&ქუოტ;ბორშჩი&ქუოტ;, მჟაუნას წვნიანი, ჭარხლის წვნიანი), ბურღულეულის, რძის, ხილის; უცხიმო ხორცის წვნიანი შეიძლება მიიღოთ კვირაში მხოლოდ ერთხელ.

ხორცი
რეკომენდებულია საქონლის, ხბოს, ბატკნის, ღორის, ქათმის, ინდაურის უცხიმო ხორცი, მოხარშული, ან ჰაერღუმელში უცხიმოდ მომზადებული.

თევზეული
მიირთვით ყველა სახის თეთრი, უცხიმო თევზი.

კვერცხი
ნებადართულია 2-3 ცალი კვირის განმავლობაში, კვერცხის ცილის ომლეტები.

ბოსტნეული და მწვანილი
რეკომენდებულია ვინეგრეტები და ზეთიანი სალათები სხვადასხვა სახის ბოსტნეულისგან (კარტოფილი, კომბოსტო, ყვავილოვანი კომბოსტო, ყაბაყი, გოგრა, პამიდორი, კიტრი), ნებადართულია აგრეთვე ხახვი, ნიორი, კამა, ოხრახუში. შეზღუდეთ ლობიო, ბარდა, მუხუდო, ისპანახი, აგრეთვე სოკო.

ხილი და ხილის წვენები
ნებადართულია ნებისმიერი ხილი. შეზღუდეთ მხოლოდ ყურძნის და მისი წვენის მიღება.

ბურღულეული და მაკარონის ნაწარმი
რეკომენდებულია ქერის, წიწიბურას, ბრინჯის, მაკარონის და ვერმიშელის ფაფები და პუდინგები, ფლავი. ჭარბი წონისკენ მიდრეკილებისას, ამ პროდუქტების რაოდენობა უნდა შეიზღუდოს.

რძე და რძის პროდუქტები
მიირთვით უცხიმო რძე, ხაჭო, კეფირი, მაწონი, უმარილო ყველი. შეზღუდეთ არაჟნის, ნაღების ნაყინის მიღება.

ცხიმები
ნებადართულია ძირითადად მცენარეული წარმოშობის ცხიმები (30 გ. დღეში), კარაქი (დღეში 20 გ.-მდე).

ტკბილეული
ნებადართულია შაქარი (40 გ. დღეში), თაფლი, მურაბა, ჯემი, შაქრის მაგივრად. ჭარბი წონის შემთხვევაში, ეს პროდუქტები უნდა შეზღუდოთ.

სასმელები
ნებადართულია სუსტი ჩაი, ყავა, ხილის და ბოსტნეულის წვენები, მათ შორის პამიდვრის წვენი, მინერალური უგაზო სასმელები სასურველია ექიმის რეკომენდაციით.

განსაკუთრებით რეკომენდებულია:

კალიუმის მარილებით მდიდარი უმი ბოსტნეული (კარტოფილი, კომბოსტო) და ხილი (ატამი, გარგარი, ანანასი, ასკილი, ქიშმიში, შავი ქლიავის და გარგარის ჩირი), აგრეთვე მაგნიუმის მარილებით მდიდარი საკვები (სოია, ქერი, წიწიბურა, ხორბალი, ნიგოზი, ნუში).

ათეროსკლეროზით დაავადებულებს ეკრძალებათ:

ცხიმიანი ხორცი, ხორცის ნახარში, ტვინი, გულ-ღვიძლი, ხიზილალა, ღორის, ცხვრის და ძროხის ლორი,
კრემები,ცხარე, მარილიანი და ცხიმიანი საკვები, კაკაო, შოკოლადი, ალკოჰოლური სასმელები.

ათეროსკლეროზით დაავადებულთა დიეტის ქიმიური შემადგენლობა:ცილები - 100 გ.ცხიმები - 80 გ.ნახშირწყლები - 350 გ. (შაქარი - 40 გ.) ენერგეტიკული ღირებულება 2600 კკალ.

ჭარბი წონის შემთხვევაში, ენერგეტიკული ღირებულება მცირდება პურისა და შაქრის რაოდენობის შემცირების ხარჯზე.

გთავაზობთ ათეროსკლეროზის სამკურნალო დიეტის ერთი დღის მენიუს:

მთელი დღის განმავლობაში ნებადართულია 250 გ. პური (150 გ. შავი, ან რუხი და 100 გ. თეთრი), შაქარი - 40 გ.

საუზმე

• 2 კვერცხის ცილისგან მომზადებული ომლეტი, ან ქერის ფაფა ("ჰერკულესი")
• ბოსტნეულის სალათი მცენარეული ზეთით
• სუსტი ჩაი, ან ყავა რძით.

მეორე საუზმე

• მოხარშული ხორცისგან დამზადებული კერძი - 55/110 g.
• ხაჭო - 100გ.
• 1 ვაშლი, ან 1 ჭიქა ასკილის ნაყენი.

სადილი

· სხვადასხვა ბოსტნეულისგან მომზადებული ვეგეტარიანული წვნიანი-500გ.

· მოხარშული ხორცი - 60გ. შერეული ბოსტნეულის გარნირით - 150 გ.

· ვაშლის კომპოტი -1 ჭიქა.

სამხარი

· მოხარშული თევზი - 85 გ.

· კარტოფილის პიურე - 150 გ. (ზეთით)

· ფლავი ხილით - 180 გ.

· ჩაი რძით - 1 ჭიქა.

ვახშამი 21 საათზე

· 1 ჭიქა მაწონი, ან შავი ქლიავის ჩირი (დამბალი) - 50 გ.

ათეროსკლეროზის გართულებისას, მიოკარდიუმის ინფარქტით, ან ჰიპერტონული, კუჭნაწლავის და სხვა დაავადებათა თანხლებისას, დიეტის კორექცია უნდა მოახდინოს ექიმმა.ათეროსკლეროზით დაავადებული ჭარბი წონის მქონე პაციენტებისთვის რეკომენდებულია დღიური რაციონის ენერგეტიკული ღირებულების შემცირება პურის, შაქრის, კარტოფილის, ბურღულეულის რაოდენობის შემცირების ხარჯზე. ექიმთან შეთანხმებით, გამოიყენება სხვადასხვა სახის

კონტრასტული (განტვირთვის) დღეები.

ხორცის ან თევზის დღე

250 - 300 გ. მოხარშული ხორცი ან თევზი გაყავით 5 ულუფად და თითო ულუფას დაუმატეთ 50 გ. ნებისმიერი ბოსტნეულის გარნირი. დღის განმავლობაში ნებადართულია 3 ჭიქა ასკილის, ან ხილის წვენი.

ხაჭოს დღე

400 - 500 გ. ხაჭო, ან ხაჭოს ნამცხვარი გაყავით 5 თანაბარ ულუფად. დღის განმავლობაში შეიძლება მიიღოთ 3 ჭიქა მაწონი/კეფირი, ან რძე.

ვაშლის დღე

1,2 კგ. ვაშლი გაყავით 5 ტოლ ულუფად, დაუმატეთ 100 გ. ხაჭო, ან მოხარშული ხორცი (დღის, ან საღამოს საათებში). დღის განმავლობაში ნებადართულია აგრეთვე 2 ჭიქა ასკილის ნაყენი.ათეროსკლეროზით დაავადებულთათვის, რომელთაც მიდრეკილება აქვთ სისხლის შედედების მაღალი ფაქტორისკენ, რეკომენდებულია რაციონში ზღვის პროდუქტების დამატება.

ძირითადი დაავადების მიმდინარეობის მიხედვით, აგრეთვე ინდივიდუალური და ნაციონალური ჩვევების გათვალისწინებით, ექიმმა, შესაძლებელია, ცვლილებები და დამატებები შეიტანოს ზემოთ აღნიშნულ რეკომენდაციებში, განსაკუთრებით, პაციენტის მიერ მედიკამენტოზური და სხვა თერაპიის გათვალისწინებით.